Для кожнага чалавека месца, дзе ён нарадзіўся, назаўсёды застаецца самым любімым.
Магчыма, гэта адбываецца таму, што дзяцінства запамінаецца яскравымі вобразамі, напоўненымі пяшчотай, любоўю, спакоем, натхненнем на вялікія справы ў будучым. Калі мы становімся дарослымі, часта вяртаемся думкамі ў бацькоўскую хату, да бярозкі, вішні або грушы, якія некалі раслі каля двара і з якімі звязана шмат падзей важных для нас у пэўны час. Заплюшчваем вочы і бачым наваколле, дзе бегалі басанож з сябрамі. Гэтыя малюнкі засталіся ў нашай памяці.
Час мяняецца, і з ім становіцца іншым наваколле. Зараз некаторыя краявіды засталіся менавіта толькі ў нашай памяці ды на фотаздымках мінулых гадоў. Менавіта фотакарткі і з’яўляюцца сёння рэальнай магчымасцю захаваць непаўторнасць краявідаў і перадаць адкрытасць, працавітасць людзей, назаўсёды звязаўшых свой лёс з любай Лоеўшчынай.
Паважаныя чытачы! Мы звяртаемся да вас с прапановай прыняць удзел у стварэнні віртуальных фотаальбомаў, прысвечаных Году малай радзімы. Дасылайце на электронны адрас рэдакцыі здымкі прыгожых краявідаў Лоеўшчыны і сваіх землякоў (з подпісамі мясцін, імён і фамілій сфатаграфаваных людзей і, вядома ж, асабістыя звесткі). Іх удзел у фотаконкурсах, якія плануецца праводзіць на працягу ўсяго года, у тым ліку і ў сацыяльных сетках, дасць магчымасць многім жыхарам ацаніць прыгажосць моманта і навакольных краявідаў, а таксама захаваць для патомкаў рэальнасць рэчаіснасці, а не выявы памяці.
Чакаем вашы работы па тэмам: “Землякі” і “Непаўторнасць вясны”, “Наваколле”. Электронны адрас: serpimolot@mail.gomel.by
Тэкст і фота Людмілы Краўцовай, «ЛК».