РАСІЯ. Больш за 250 беларускіх ваенных бяруць удзел у стратэгічных камандна-штабных вучэннях «Усход-2022», якія стартавалі 1 верасня. Усяго ўдзельнічаюць больш за 50 тысяч ваеннаслужачых з краін ШАС і АДКБ. Задзейнічана больш як 5 тысяч адзінак узбраення і ваеннай тэхнікі, у тым ліку 140 беспілотнікаў і 60 баявых караблёў, а таксама іншых ваенных судоў. Вучэнні пройдуць на сямі палігонах Усходняй ваеннай акругі Расіі, у акваторыях і прыбярэжных зонах Ахоцкага і Японскага мораў.
Вучэнні не накіраваны супраць якіх-небудзь канкрэтных дзяржаў або ваенных саюзаў і маюць выключна абарончы характар.
Акрамя Беларусі і Расіі, у вучэннях бяруць удзел ваенныя яшчэ 11 краін.
ЛІТВА. Асноўныя работы па будаўніцтве агароджы на літоўска-беларускай мяжы завершаны. Аб гэтым заявілі ў кампаніі EPSO-G, якая займалася рэалізацыяй праекта будаўніцтва.
Па дадзеных EPSO-G, даўжыня канструкцыі склала 502 км. Асноўныя работы падышлі да канца, аднак у бліжэйшы час яшчэ плануецца ўстараніць некаторыя дэфекты.
Кошт работ склаў 152 млн еўра.
Варта нагадаць, што рашэнне аб будаўніцтве агароджы было прынята летам 2021 года. Літоўскія ўлады спадзяваліся з дапамогай дадзенай канструкцыі спыніць бежанцаў, якія спрабавалі праз Літву патрапіць у больш паспяховыя краіны Еўрасаюза.
Міністэрства аховы здароўя ЯПОНІІ адобрыла выкарыстанне прэпарата ад каранавіруса Pfizer для рэвакцынацыі дзяцей ад 5 да 11 гадоў.
Дарэчы, 24 сакавіка гэтае ведамства адобрыла рэвакцынацыю дзяцей ад 12 да 17 гадоў.
У Японіі афіцыйнае адабрэнне маюць вакцыны супраць новага каранавіруса кампаній Pfizer, Moderna, Novavax і AstraZeneca. Пры гэтым для вакцынацыі насельніцтва прымяняюцца ў асноўным толькі першыя дзве.
ЗША. У Каліфорніі атрымаў заканадаўчае адабрэнне дакумент, які дазваляе караць медыкаў за распаўсюджванне дэзінфармацыі ў дачыненні да вакцынацыі і лячэння COVID-19. Аб гэтым паведамляе ТАСС са спасылкай на The New York Times.
Адпаведны дакумент прыняла верхняя палата заканадаўчага сходу штата Каліфорнія. Законапраект уступіць у сілу пасля таго, як яго падпіша губернатар Каліфорніі Гэвін Ньюсам.
Згодна з новай ініцыятывай, агучванне пацыентам ілжывых дадзеных аб каранавірусе будзе прызнана непрафесійнымі паводзінамі, за якія пагражае пакаранне ў выглядзе часовага адхілення ад працы або адклікання медыцынскай ліцэнзіі. Каліфорнія стане першым штатам з такім пакараннем.
У ПОЛЬШЧЫ закрыццё прадпрыемстваў па вытворчасці азотных угнаенняў можа прывесці да дэфіцыту сыроў і мясной прадукцыі, паведамляюць РІА Навіны са спасылкай на выданне Wirtualna Polska.
На мінулым тыдні дзве буйныя польскія кампаніі па вытворчасці угнаенняў — Grupa Azoty і ANWIL — заявілі аб прыпыненні працы з-за высокіх коштаў на газ. У прыватнасці, кампаніі згарнулі вытворчасць поліаміду, капралактаму і азотных угнаенняў. Гэта прывяло да спынення паставак вуглякіслага газу — пабочнага прадукту вытворчасці угнаенняў. Вуглякіслы газ выкарыстоўваецца ў мясной і малочнай прамысловасці, напрыклад, пры пакаванні прадуктаў, а таксама пры ачыстцы вытворчых ліній. Калі азотныя заводы не запрацуюць, то ўжо ў верасні з польскіх крамаў знікне шэраг катэгорый тавараў, у тым ліку мяса, сыр і піва, адзначае Wirtualna Polska.
ФІНЛЯНДЫЯ. Кампанія Väre, якая займаецца продажам электраэнергіі ў краіне, расказала, што ў яе адрас паступае вялікая колькасць запытаў аб магчымасці пераключэння кантакту з дзённага спажывання электраэнергіі на начное.
У асноўным такія запыты датычацца вытворчасцей, дзе тэхналагічны працэс даверылі робатам.
Такія меры разглядаюцца з мэтай эканоміі на плаце за электраэнергію ў самыя дарагія гадзіны спажывання.
ПАРТУГАЛІЯ. Санкцыйны бумеранг ударыў па партугальскіх фермерах. Ураджай цеплалюбівых апельсінаў атрымаўся добрым. Аднак аказалася, што праз антырасійскія санкцыі іх проста няма каму прадаваць. Рынак сутыкнуўся з перанасычэннем, выдаткі на вытворчасць растуць, а кошты на прадукцыю даводзіцца зніжаць, а такая праца — на страту.
ІСПАНІЯ. Іспанскі ўраджай мідый пад пагрозай. З-за павышэння тэмпературы вады ў рэках гаспадаркі па вырошчванні малюскаў паведамляюць аб стратах 150 тысяч кілаграмаў дэлікатэсаў. Загінула таксама частка патомства. Па папярэдніх падліках, фермы мідый страцілі каля мільёна еўра даходу.
