Сустракайце нашу новую падборку цікавых фактаў аб родным краі!
Адзіны ў Беларусі фарфоравы завод працуе ў Добрушы
Легендарны брэнд Беларусі — лідар па вытворчасці фарфоравай прадукцыі ў СНД. Ці ведаеце вы, што фарфор — гэта вышэйшая форма керамікі? Аднак у нас гэтая раскоша даступная кожнаму жыхару і госцю краіны.
Гомельшчына — цэнтр сельскагаспадарчага машынабудавання Беларусі
Машынабудаўнічы комплекс — аснова індустрыі Гомельскай вобласці. Гэта холдынг “Гомсельмаш”, завод пускавых рухавікоў, маторарамонтны завод, Гомельагракамплект, Гомельаблаграсэрвіс, Мазырскі АРЗ, Калінкавіцкі рамонтна-механічны завод і інш. У ім налічваецца больш за 30 % вытворчага персаналу рэгіёну.
Помнік беларускай згушчонкі ўсталяваны ў Рагачове
Рагачоўская згушчонка — адна з самых вядомых гандлёвых марак Беларусі. Першы ў свеце помнік згушчанаму малаку быў адкрыты ў Рагачове ў 2013 годзе. Усталяваны ён насупраць ААТ «Рагачоўскі малочнакансервавы камбінат».
Кіно ў Жлобіне
У 1955 годзе кінастудыя «Беларусьфільм» зняла ў Жлобіне мастацкую стужку “Зялёныя агні”. Прэм’ера карціны адбылася ў красавіку таго ж года, а дзеянне фільма разгортваецца на чыгуначным вузле, дзе працуе малады машыніст грузавога цягніка Сяргей Чабур. Дарэчы, у масоўцы бралі ўдзел не прафесійныя акцёры, а простыя жыхары Жлобіна.
Самая доўгая набярэжная ў Беларусі знаходзіцца ў Гомелі
Добраўпарадкаваны бераг ракі Сож — любімае месца адпачынку гамяльчан і гасцей горада. Працягласць гомельскай набярэжнай складае больш за 3 кіламетры. Яе галоўным упрыгожваннем з’яўляецца кампазіцыя «Маяк», якая складаецца з 48 апор з ліхтарамі на гранітным пастаменце.