Любоў да вёскі ў песнях і справах

Свята вёскі Мохаў атрымалася насычаным нечаканай актыўнасцю вяскоўцаў.
Калі казаць па праўдзе, дык першыя хвіліны да пачатку канцэртнай праграмы адчувалася нейкая напруга сярод мясцовых жыхароў. Але святочны настрой узяў верх над усімі існуючымі праблемамі і цяжкасцямі. Суботнім вечарам людзі сабраліся каля мясцовай установы культуры, каб адпачыць. Амаль з першых слоў пра родную вёску яны актыўна ўключыліся ў падзеі.
Традыцыйна на вясковым свяце шанавалі ўсіх, хто сваёй працай, жыццёвым вопытам набыў павагу сярод жыхароў Мохава. Хвілінай маўчання памянулі вяскоўцы тых, хто загінуў у гады Вялікай Айчыннай вайны. Амаль з кожнага двара вёскі мужчыны, надзеўшы шынялі, ішлі на фронт, каб вытрымаць найцяжэйшыя выпрабаванні і здабыць Перамогу. Не менш сіл і імкнення да лепшага жыцця спатрэбілася вяскоўцам у мірныя гады, калі давялося цяжка і плённа працаваць ва ўсіх галінах народнай гаспадаркі.
У святочны вечар вядучыя мерапрыемства разам са старшынёй Каўпенскага сельскага Савета Людмілай Прымак сардэчнымі пажаданнямі і памятнымі падарункамі шчыра віталі старэйшых жыхароў Мохава і самую маленькую жыхарку. Адзначалі тых, хто заўсёды сочыць за парадкам каля домаўладання, імкнецца сваё падвор’е ўпрыгожыць шматлікімі кветкамі і фарбамі. Асобная падзяка — працаўнікам сельскай гаспадаркі, словы ўдзячнасці — медработніку, настаўнікам, паштарцы, бібліятэкарам і г.д.
Кожны ўдзельнік свята паспрабаваў смачнага караваю і атрымаў шмат добрых эмоцый. Ад усёй душы стараліся спяваць для вяскоўцаў самадзейныя артысты Каўпенскага сельскага цэнтру культуры і вольнага часу: Пётр Краўчанка, Аляксандр Грэбянок, Любоў Барадзіна і Галіна Марчанка. Нечаканай імправізацыяй сталі музычныя выступы Аляксандра Кашперкі і Таццяны Федукевіч. Аднавяскоўцы шчыра апладзіравалі за песні, якія спадабаліся, і з асаблівай асалодай танцавалі пад адкрытым небам, перагаворваліся адзін з адным. Нехта ўспамінаў мінулыя гады, другія распытвалі пра жыццё землякоў, якія рэдка маюць магчымасць наведацца ў родную вёску. Маленькія непаседы тут жа каля дарослых гулялі або бралі веласіпеды і імчалі ўперад па дарозе.
У такой простай і прыемнай абстаноўцы час праляцеў хутка. З добрым настроем, гумарам і жаданнем актыўна паўдзельнічаць у канцэртнай праграме жыхары Мохава працягвалі адпачываць. Яны спявалі самі і разам з самадзейнымі артыстамі, пускаліся ў пляс і проста размаўлялі.
На здымках: у час святкавання.
Тэкст і фота
Людмілы Краўцовай, “ЛК”.

Смотрите больше фотографий в «Фотогалерее».